قصة قدر مكتوب الجزء الثالث

#قدر_مكتوب

الكاتبة. Zainab Farqad

بارت 3

سيء جداً أن تحمل هموما ليست مناسبة لسنك ، في وقت من المفترض أن تعيش أجمل أيام حياتك 💔

🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀

رحت اكعد امي ما تتحرك ضليت أحاول ماكو فائدة كمت أصرخ بعلو صوتي

وديان : اجني يركضن اخواتي وكامن يعيطن صرنة بحالة هستيرية وابوية ما موجود ، مدري وينة مبين البارحة مااجة

دكيت عليه بس ما يجاوب كالعادة اصلا هو شوكت متذكرنة عجزت ادك عليه مااكو ميجاوب شمرت الموبايل

رحت اركض لبست عبايتي ودكيت الباب ع بيت ابو سامر كبال بيتنا ما عدنا احد غيرهم صحيح مو هلكد علاقتنة ع كد السلام بس ابو سامر رجال كلبة طيب اكيد ما راح يردني

دكيت الباب طلعلي ابنة سامر. هو مبين بالكلية بس من ذولة الطايشين فد مرة

سامر : ها يا حلوة شتردين

وديان : دموعي ينزلن وامسح بيهن ، عفية ابوك موجود امي مدا تتحرك مدري شبيها فدوة خلي يوديها للمستشفى

سامر : اوكفي لحضة ،

وديان : دخل بسرعة وطلع ابو وامة اجوي يركضون

ابو سامر : ام سامر ادخلي وياها للبيت لبسوها عباية خل ناخذها

وديان : دخلت ام سامر وياي ، لبسناها عباية واخواتي يبجن يريدن يجن وياية ما خليتهن اني كوة متحملة والنوب اخواتي وياي

من طلعت وصيت منى ، كلتلها قفلي الباب لحد ما يجي ابوية وكليلة يلحكنا للمستشفى

طلعنة وابو سامر اخذنة بالسيارة مالتة بس امي ماتت ادري بيها ما تشيل لا ايد ولا رجل تخبلت بالبجي الطريق كله حاضنتها وابجي

نزلنة بسرعة جابو السدية واخذوها ، طلع ، كال البقاء لله سوو اجراءات شهادة الوفاة حتى تطلعوها تدفنوها

كمت اصرخ بعلوو صوتي جنت طول مااني كاعدة انتضر اوهم نفسي يكلولي امج عايشة ، اجتي ام سامر تحاول تهدئني

وابو سامر عجز يدك. ع ابوية ميشيلة ، كال اني اكدر اسوي الاجراءات بس لازم ابوج يحضر يعني

نحاول نتصل بي ماكو للعصر ، خابرت منى من رقم امي ع رقم ام سامر جان عدنة رقمها لاءن تخيط يمنا مرات

جاوبت ام سامر وكانت بعيونها انصدام وتعحب سدتة وكالت

ام سامر : ابو سامر هاي منى خابرتني تكول

ابو سامر : اي شتكووول

ام سامر : تكول خابروني من المستشفى ابوها مسوي حادث وتوفى وهسة هو بمستشفى ال .....

وديان : هناا الخبر كان مثل الصاعقة ونزلت علية ، تخربطت وحارو يكعدون بية ، ضليت ابجي

صحيح ما يوم حبيت ابوية ولا حسيت بحنانة ، بس احنة محتاجيلة هذاا اليوم معقولة نفقدهم ثنينهم بيوم واحد ليش يااربي وين نروح واحنة بنات وحدنة

ابو سامر خابر سامر اجة اخذنة اني وامة وكال ابو سامر اني راح اتكفل بسالفة الدفن ، رجعت للبيت كوة امشي ام سامر تمشيني دخلتني للبيت

طلعت منى فتحت الباب ، واخواتي كلهن كاعدات يبجن ووجهن ميبين من الدمووع واني كوة واكفة ع رجلية اصعب يووم مر بحياتنة ،

ابو سامر ماخذ امي وابوية هو والجيران دافنينهم ، بس ما شفناهم بعد ، اهم شي تكفلوو يدفنوهم

لا سوينة فاتحة ولا شي ما عدنا احد يعزينا بس كم مرة من الجيران اجتي علينة وام سامر بين فترة وفترة تجي علينا بس احسها كاعدة ع اعصابها وكأن واحد جابرهة تجي علينا

احنة عشنة بحالة مأساوية ، لبسنة اسود ، وكل وحدة دخلت بعالمها الخاص ، عالم مليئ بالصدمة والذكريات والتخيلات والاحلام والاوجاع والالام

الي فهمتة من أبو سامر أصدقاء ابوية كانوا سكرانين وطالعين رايحين بالسيارة لمكان سووو حادث

أبويةوبعد واحد من اصدقائة توفوا وواحد اصابتة خطيرة يعني صار مقعد ما يحرك لا ايد ولا رجل

امي وابوية توفوا بيوم واحد اااااخ بالقدر

معقوله هذا القدر الي نكتب النا امي وابوية يتوفون بيوم واحد

ورة اسبوعين رجعت اخواتي للمدرسة بس اني ما عندي حيل اداوم ما بية ، خواتي حسيتهن اقوى مني

المفروض اني اصير اقوى منهن بس ما كدرت

اجتني رحاب للبيت تتوسل بية ارجع للمدرسة

رحاب : وديان انتي ليش هيج تسوين امج وابوج راحو لدار حقهم والله يرحمهم ليش تتركين المدرسة

وديان :ما عندي حيل رحاب احس روحي مكسورة ماعدنا أحد احنة لازم اني اشتغل اي شي بس المهم خواتي يدرسن اني مو مهم دراستي

رحاب : شنو هل حجي توقعتج أقوى من هيج واهم شي عندج دراستج توقعت راح تحاربين العالم علمود دراستج

وديان: قبل كنت قوية بس هسة ما عندي قوة مااكدر

رحاب: لعد شلون هسة شتسوين

وديان: راح اشتغل وادبر لكمة العيش علمود خواتي اني راح اكون امهن

ضلت رحاب شوية وراحت ما تكدر تبقى

، مر شهر وخلصن الفلوس مالت الخياطة والشغل جانت امي ضامتهن خلصن ع مسواك

والايجار هل شهر ما دبرتة ، اجة ابو البيت يريد الايجار كتلة ما عندي وتعرف ضروفنة هو ماكو رحمة بكلبة كال الشهر الجاي اريد مال شهرين وزيادة عليهن

كتلة ليش زيادة عليهن يكلي لاءن تأخرتي بالدفع ، استغفر الله هذا شحجي ويا كتلة الله كريم وطبكت الباب

شسوي ضليت حايرة ، وصيت خواتي يحجن بالمدرسة اعرف اسوي كبة وكليجة وهذني الشغلات بلكت الناس تشتري. ، كلت لازم اصير قوية واواجه الناس علمود اخواتي

بس مااكو حتى اتذكر بيوم ما عدنة شي ناكلة ولا اي شي ضلينة نحمد الله وكلنة الله ما ينسى عبدة ، فجئة ندكت الباب ، ام سامر جانت جايبتلنة عشة

تشكرنة منهة بس ردت من ورة خشمها ، ليش هيج تتصرف ويانة احسها وكأن واحد ديجبرهة تسوي خير ويانة صحيح دتسوي خير ويانة بس مو من كل كلبها عبالك

جنت نايمة وباوعت ع اصابع ايدي جنت ارسم بالقلم الجاف عيون وخشم وحلك بعني وجه كامل ع كل اصبع الاصبع الجبير امي وبعدها ارسم نفسي وبعدها منى وبعدها صابرين وبعدها ورورد

الرسمة عبارة عن دائرتين هي العيون وخط مستقيم هو الخشم وقوس هو الحلك مبتسمين وارسم بين جوانب الاصابع ع شكل ايد متماسكين كلنة

ابد ما رسمت شي يدل ع ان ابوية موجود

جنت نايمة باوعت الايدي امي ماكو مختفية اصبع امي الرسم مالتة ماكو صاير باهت كوولش اختفى بقينة بس اني وخواتي

من هل يوم اعتبرت اني عندي اربع اصابع مو خمسة 💔

خلص الشهر الثاني ع كم شغلة سويتهن ويادوب اجيب اكل للبيت وما كدرت اجمع فلوس الايجار حتى مال شهر

اجة ابو البيت ويريد الايجار ضليت اتوسل بي يريد يطلعنة كتلة ما عدنة احد والله ، هو قفل ع موضوع وكال بعد اسبوع الكة البيت فاارغ

يعني ابد ما شفت هيج ناس ما عدهم رحمة ، ضليت حايرة يا ربي شسوي ورة اسبوع اجة ابو البيت

وهل مرة من صدك كام يصيح ويستقوي علينا كال اطلعوو من البيت وكام يهدد ، اجة ابو سامر شافني بالباب احجي ويا وهو صوتة عالي

كام يستفسر من عندة ، وكال ابو سامر بنتي فرغو البيت ، كتلة والله ما عدنة احد كان تركنا البيت

رجع ابو سامر يحجي ويا كالة اني انطيك الايجار ، كالة حتى لو تنطيني هذني بعد مااريدهن ببيتي

كالة ليش يعني ، كالة بنات وحدهن والله ليعلم شيسون ، ابو سامر ما تحمل وضل يصيح عليه ويكلة هذني اشرف منك ما يوم طلعت منهن العيبة

اندار علية ابو سامر وكال حضرو غراضكم وتكعدون يمي ، شكد حزت بكلبي هيج العالم تتهمنة من لا شيء

يعني ما مسوين شي ويتهمونة لاءن ما عدنة احد ، كمت ابجي واكول يا يمة نذلينة من بعدج

كمنة نلم بغراضنة واني افكر بكلام امي وصتني ع اخواتي كافي لازم اتحمل واسوي المستحيل علمودهن

من داالم بالغراض تذكرت يوم من الاياام

خواتي رجعن يداومن كانت نهاية السنة واني ما كدرت اداوم وارجع للمدرسة اتحملت مسؤلية البيت اني وكمت اشتغل وانضف وادرس خواتي

في سبيل ينجحن ويوصلن وقطعت عهد ع نفسي اخليهن يوصلن ويتخرجن حتى لو اني ما كملت تعليمي خواتي اهم شي بالدنيا عندي

منى شاطرة هي صف رابع مرات يصير عدها شي ما تفتهمة تجي اشرحلهة يا ، و ورود ثاني متوسط 

دراستها مو حيل صعبة

يعني بسرعة تحفظ وتجي اراجعلها ، اماا صابرين فصابرين بحد ذاتها مشكلة صف ثالث متوسط بكلوريا وتخاف مدري من كايللها البكلوربا مثل الاعدام

وديان : صابرين حبيبتي شبيج قابل انتي ما ممتحنة بكلوريا بالسادس ابتدائي شفتي كلشي ماكو ولا يخوف ولا شي كأي امتحان عادي

صابرين : مو بأيدي هذا الشي اني بية خوفة من اي امتحان والبنات الي وياي بس يخوفن بية ويكولن الاسئلة تجي صعبة بالوزاري

وديان : ماكو شي يصعب ع شاطر ما دام انتي قارية ومفتهمة المواد راح تجاوبين كأن امتحان شهري من تمتحنج المدرسة

لا تسوين هيج ولا تخافين انتي اقري وسوي الي عليج وتوكلي ع الله وربج يحلها

صابرين : ونعم بالله

وديان : وهسة انطيني الكتاب خل اسئلج

ضليت اسأل بيها وهي تجاوب وارجع اكوللها اكتبي الجواب بالورقة حتى لا تنسين هاي افضل طريقة للطالب ما ينسى ابد الجواب الي كتبة

اجتي ورود

ورود : ودياااان ، وديااان

وديان : شكو شبيج

ورود : هاي المسألة بالرياظيات ما داتنحل

وديان : تعاي جيبي الكتاب خل اشوفها ، باوعت عليها سهلة ،

صابرين اقري هاي النقاط لما احل لورود المسألة واسئلج بيهن

صابرين : ماشي ،

وديان : كمت افهمهة المسألة وانطيتها مثال تحلة كعدت يمي تحل بي ، اجتي منى

منى : وديان عفية سمعيلي تعودت انتي تسمعيلي الي حفضتة ، وتسأليني

وديان : ابتسمت ، تعالي يلا

كمت اسئلهة وهي مرات تجاوب ومرات لا ، نبهتها ع كم فقرة تقراها ، كعدن كلهن يمي بالغرفة يقرن واني اباوعلهن

حسيت نفسي صدك امهن ، اني ادرسهن واطبخلهن وانضف واشتغل كولشي علية حسيت هذني بناتي مو خواتي صحيح هنة كبار ويكدرن

يشيلن مسؤلية نفسهن بس رغم كولشي متعلقات بية ومايكدرن يسون شي بدوني

مرت الاياااام

وصارت الامتحانات ، امتحنت ورود ومنى ، بس صابرين بعدها لاءن وزاري تأخروا بعد اسبوع يلا يمتحنون

صار وقت النتائج مال منى و ورود ، راحن جابن النتائج واجني ، بنفس التوقيت كانوا المدرسة جامعين المدرستين

المتوسطة والاعدادية ، بوقت واحد ويوزعون نتائجهم ، جنت كاعدة بالصالة امسح الاخشااب فزيت ع صوت 

منى

منى : وج ودياااااااااان

وديان : طلعت مخروعة من الصووت رحت اركض مااعرف شلون وصلت المطبخ الصوت جاي من عندة

شبيج منى شكووووو ؟؟؟؟

منى : وج ودياان نجحنا اني و ورود نجحناااا

وديان : صدووك الف مبروووك حبيباتي تستاهلن رحت حضنتهن ،

صابرين : يا خاينات تحضنيهن وديان بس هنة مووو ، لاءن نجحن واني تراا بعدني ما ممتحنة يعني مو عبالج راسبة وهيج تعامليني

وديان : عاابت تعاي انتي هم ، لو ترسبن اهم احضنجن شعندي غيرجن ، شو شوفني النتائج دااشوف درجاتجن

باوعت درجاتهن زينة يعني هن شاطرات ، ولج منى شنو هل صوت خرعتيني عبالي شوف شكوو

منى : والله اني هذا صوتي شسويلج انتي من اي شي تخافين وعبالج صار شي

ورود : تمنيت امي ويانة وتفرح بنجاحنة

الكل : الله يرحمها

وديان : ما ردت يتعكر مزاجهن بهذا اليوم امي ماتت الله يرحمها ما يصير هيج نضل

اييي وشتريدن هدايا اجيبلجن ،

منى : انتي اغلى هدية عدنة

وديان : فديتج حبيبتي ، بس ما يصير ع اقل هدية بسيطة كولي شنو بخاطرج اجيبلج

منى : والله مااريد شي ، تعمدت مااحجي شي ولا اطلب اي شي من وديان رغم اني ناقصني هواي غراض بس ادري بوديان كوة تدبر فلوس علمود الاكل

وما تكوللنة ، دائما تكول اني عندي وانتن شتريدن اجيبلجن ، تريد ما تخلينة نحتااج شي

ورود : بس اني اريد هدية

وديان : كولي شتريدين عيوني الج

ورود : تسلم عيونج ، اريد تسويلي دولمة من ايدج الحلوة. دولمتج لا تقاااوم

وديان : تدللين هسة ، يجي ابو المخضر واشتري مواد الدولمة واسويلج

ورا شوية سويتلهة الدولمة كعدت الف بالدولمة وخواتي كاعدات صابرين لازمة الكتاب ومبرطمة ومنى و ورود يلعبن حية ودرج

وديان : شبييج صااابرين هيي ليش مبرطمة

صابرين : شوكت اخلص عااد اريد امتحن واخلص رااح اموت

وديان : ما بقى شي شدي حيلج

صابرين : اووف ياربي فدواتك استجب دعائي كون هسة اغمض وافتح عيوني الكة نفسي مخلصة امتحانات وناجحة وكاعدة داالعب حية ودرج ويا منى و ورود

وديان : هههههههههه انتي كلتي هذا الدعاء علمود تلعبين حية ودرج

صابرين : اي والله ، صعب اشوف خواتي يلعبن واني لازمة الكتاب واقرة

منى : طاااحضج ، بدل ما متفكرين بالامتحان ، جاي تفكرين شوكت تلعبين، صيري شاطرة مثلي وانجحي 😎😎😎😎

صابرين : انتي اسكتي ، مو خلصتي امتحانات وكمتي تحجين علية ، عود شوفوني رحت للخامس ، هييي تراا رحتي خامس علمي

مااخذتي شهادة الماجستيرر

منى : غصبا عليج اخذهة

صابرين : ما تاخذينها شنو لازمتج

وديااان : وتااالي شوكت تبطلن مناكرة. صابرين اقري ما عليج بيهن وانتي منى عوفيها

كملت الدولمة حطيتها ع طباخ تستوي ورحت كملت شغل البيت ، صار. اذان الغداا

صحت عليهن كلتلهن اذن كومن صلن ، رحنة صلينة كلنة وصبيت الغداا

ورود : اووف يمة مو دولمة تخبل عاشت ايدج

وديان : بالعافية

ورود : الله يعافيج

منى : ورود كافي اكلتي هواي

ورود : والله مااكلت هواي

منى : وج شوفي صايرة شسمنج من الاكل

ورود: وديااان صدك اني سمينة 😭😭😭

صابرين : اي والله سمنانة صايرة جنج برميل راح تنفجرين

وديان : هههههه ، لا حبيبتي يتشاقن وياج ما عليج بيهن اكلي شكد ما تريدين يغارن منج لاءن هنة معصعصات مو مثلج مدبدبة تخبلين

ورود : بس انتي ترفعين معنوياتي

منى : يمعووودة وديان انتي ليش هيج تشجعيها شوفي خلصت صينية الاكل

وديان : وانتي شتريدين منها خليها تااكل

منى : مو السمن موو حلو

وديان : هي مو سمينة وانما مدبدبة وعدها خديدات

صاابرين : وج ورود كافي بقي شوية خل اكل مااكلت

ورود : والله اني هم مااكلت تراا

منى : هاي اذا اكوم اركعها بالحايط احد يكولي ليش ، اذا انتي مااكلتي لعد منو خلص الصينية

ورود : شسوي الدولمة طيبة

وديان : جانت ورود تحجي وخدودها مليانات وتضحك ع روحها شلون اكلت بشراهة ورود متروسة ومدبدبة جسمها جسم بنية جبيرة بالاعدادية مو متوسطة

هي خشنة شوية وطويلة وتاكل هواي ، بس السمن ما مبين متناسق ويا طولها ، واهم شي خدودها يخبلن عدها غمازات

يتبع

تحياتي

12/6/2019