الكاتبة Zainab_Farqad
بارت 11
ولنا في القدر اشياء جميلة لا نعرفها ..💕
وديان: كنت دااقرة وكاعدة يم الفرن انتظر البيتزا تستوي اندكت الباب، رحت فتحتها، طلعت خالة ام عبدالله
ام عبدالله؛: هلو وديان شلونج
وديان: الحمدلله خالة تفضلي
ام عبدالله: جنتي داكة علية خير صاير شي
وديان: لا خالة ماكو شي، بس سويت بيتزا وحسبت حسابكم ويانا
ام عبدالله: فدوة لبنيتي ليش تعبتي نفسج ، انتي ماكافي عليج الشغل والقراية
وديان: لا خالة ماكو تعب بس انتضريني دقايق اجيبها
دخلت ام عبدالله يم البنات تسئلهن عن دروسهن واني حطيت البيتزا وغلفتهة الها واخذتهة وتشكرت من عندي وراحت
قائد: حضرت جنطتي باجر من الصبح اطلع وامي مدري وين راحت ، نزلت لكيت الولد كاعدين
مصطفى: قائد صدوك راح تسافر
قائد: اي والله
احمد: يعني شعجب ليش تسافر وشكد راح تضل
قائد: عندي شغل راح اضل 6 اشهر
احمد: معقوولة شدعوة هلكد شعندك
ماجد: علينااا عليناااااا عليناااااا
قائد: وجع شكو شبيك شنو علينا
ماجد: اخاف رايح تتزوج من ورانا
قائد: ليش ما تنجب ع شنو من وراكم، خايف منك لو شنو
ماجد: لا بس هيج دااكول
قائد: انجب ولا تكول
دخلت امي وبيدهة علاكة شايلتها حطتها يمنا وماجد هجم عليها
ماجد؛: افيييييش شنو هل ريحة ياااربي
مصطفى: هاااي شنو شجايبتلناا يمة،
ام عبدالله: هاي بيتزا من جوارينا الي كاعدين بالمشتمل. الام مسوية ودزتلنة
ماجد: راح اجيب سجين نقطعها بعد مااتحمل ريحتها لا تقااوم
احمد: يمةةةة
ام عبدالله: شبيك طرشت اذني تراا اني كاعدة يمك
احمد: سويلي عشة
ام عبدالله: مابية حيل اكلو البيتزا واسكتو
احمد: شنو بيتزا مو تدرين بية مااحبها
ام عبدالله: استغفر الله ياربي شسويلك لعد
احمد: اريد كبة
ام عبدالله: مابية حيل اسوي هسة، والله ضهري يوجعني
احمد: لعد شلووون اريد كبة مشتهيها
قائد: ووجع شبيك الي كول حامل ويتنسى مداا تشوف امي تعبانة ما بيها حيل تسوي
ماجد: ما دام تدري بيها تعبانة تزوج وفضها وخليها تساعدها
ام عبدالله: يوم عيد عندي من قائد يتزوج
قائد: خلي مصطفى يتزوج اني مااتزوج هسة
احمد: اكول صدوك انت شتنتظر لحد هسة ما تتزوج
قائد: اكوول شبيكم بس توجهون الحجي الي وجهوو الحجي لمصطفى هم تراا مو صغير هو هم
مصطفى: اي اني راح اتزوج مو مثلك
ام عبدالله: صدووك صوفي كول والله،
مصطفى: وداعتج
ام عبدالله: من باجر ادورلك ع وحدة تناسبك
مصطفى: ماكو داعي تدورين موجودة اصلا هي
ام عبدالله: هااا صدووك يمة منوو هاي اعرفها اني
مصطفى: اييي تعرفينها كوولش زين بعدين اكولج منو هي خليها لوقتها
ماجد: واووووو شنو هاااي الشغلة متطورة واحنة ما ندري
قائد: ولك اشو مسويها سكتة منووو هاي
مصطفى: انت بالذات مااكولك منو هاي
قائد: رفعت حاجبي ولويش يعني
مصطفى: بعدين تعرف
تعشينة البيتزا واحمد راح سواا لفة جبن وجاي
ماجد: بدال هاي الجبن والجاي كان اكلت بيتزا لك تفوووتك والله تخبل
احمد: خلووهة الكم مااريد
مصطفى: افييش فدشي حتى اطيب من مال السوق، يوووم امانة وصيها خل تسويلنة بعد
ام عبدالله: بالعافية، تدلل اوصيها
قائد: كنت مستمتع بأكل البيتزا واتصنت فقط ع اخواني بدون كلام يمكن لاءن حزنان راح افارقهم
بالليل امي جهزتلي الشغلات الي احتاجها
ومن الفجر طلعت وامي كعدت ودعتهة وكلتلهة تسلملي ع اخواني كانوا نايمين
ووصيتها ع نفسها وضلت تدعيلي وتبجي هاي اول مرة راح افارقها هل مدة
طلعت وصلت للمشتمل باوعتلة بنظرة اخيرة، احس اكو سر وراء هذا المشتمل، اوو سر شنو اني شدااحجي رحت توجهت للمركز وطلعت
وديان: كعدنة كالعادة مثل كل يوم ننضف بالبيت ونسوي ريوك. كان يوم سبت عطلة اندكت الباب عرفنة ام عبدالله ماعدنة احد غيرهة يجينا
ام عبدالله: صبااح الخير شلونكم بنات
الكل: صباح النور
وديان: الحمدلله انتي شلونج
ام عبدالله: ع الله
وديان : جبت صينية الريوك ، يلا خالة تفضلي
ام عبدالله: والله ماالي نفس اكل اكلو انتو بالعافية
وديان: ليش خالة شبيج
ام عبدالله : ابني قائد اليوم سافر راح يضل 6 اشهر عندة شغل وهاي اول مرة راح يفارقني هلكد
وديان: يروح ويرجع بسلامة لا تنقهرين
ورود: يااا هذا قائد قصدج الضابط الحلووو
وديان: ورود ولج عيب
ام عبدالله: ههههه اي هو
ورود: اكول خالة اشو اني ماشفتة ابد اخر مرة من كنا بالتحقيق وهنا ما شفنا
ام عبدالله: مو هو عندة شغل وخفارات يجي قليل وانتن ما تطلعن يعني ما تشوفنة
وديان: اني اعرف بام عبدالله انو ما حجتلة احنة كاعدين هنا هي كالتلي
شكالتلة، اخذتلي صفنة وتذكرتة تذكرت ملامحة؟، صدووك صار شكد ما شايفينة
احس طبعة حاد بس بنفس الوقت قلبة طيب، الله يوفقة، بس هو لحد الان ما أمن بينة عبالة احنة من هذولي البنات استغفر الله
لذلك امة ما كالتلا علينا خوفا ما يصدكنة ويطردنا من البيت
قائد: اول3 ايام من السفر كضيتها شغل يادوب اخابر امي واطمنها وهي تضل بس تبجي وتكولي مشتاقتلك تقطع قلبي
واضل اكوللهة اعتبريني بالمركز وعندي خفر، ووديان اووف يا ودياان لعبت بعقلي لعب اتمنى الكاها بس وين راح الكاها
شلون ادور العالم كله لو شلوون اووف ياربي فدواتك ليش خليتني احبها واتعلق بيها وراحت من ايدي
بعد مرور ست اشهر
وديان: خلال هاي الاشهر احنة مستمرين بالقراية وترتيب البيت ع خواتي واني علية الطبخ وكولشي واشتغل واقرة
اريدهن يرتاحن وما يتعذبن ، وراها بفترة صارت امتحانات نصف السنة ونجحنة ووراها امتحانات اخر السنة وهم نجحنة كولنا
الفرحة ما سايعتنا، واكثر شي فرحت بي ورود نجحت من الثالث راح تداوم
ويانة ما راح يبقى بالي يمها وخالة ام عبدالله ما قصرت ويانة ابد
دائما تجي تسئل علينا وتطمئن واني كمت اطلع مصروفي ومصروف خواتي والايجار وكل ما اجمع فلوس نشتري شغلة للبيت
طلعاتنا قليلة واذا نطلع بس ويا ام عبدالله ع كد نروح للسوق نشتري الغراض الي نريدها ونرجع
الي نتبهت عليه كل ما نروح للمدرسة مصطفى واكف من الصبح احسة دينتضرنة يباوع لمنى عرفت نضراتة بيها حب حسيتة
بس اني منبهة على خواتي هاي السوالف مااريدها ابد، ومنى من تشوفة تدنك
وما تهتم، بس المشكلة ورود ماادري شبيها مربيتلي علة ع قلبي
مااعرف شبيها ما تحجيلي من نوع الكتومة، بس اني لازم ااعرف شبيها بأي طريقة
وابشركم صديقتي رحاب تزوجت سيف واخيراا وخلصت من مرت ابوهة ومرتين اجتي لبيتنة، تسئل علية اني مااكدر اروحلهة
لاءن هي كاعدة ويا عيالها واستحي اروح وخواتي مااكدر اعوفهن وحدهن بس ع كد المخابرة اطمئن ع احوالهة
قائد: مرت ال6 شهور وصدكوني ماكو يوم مر بدون مااتذكر وديان، وبكل لحضة ادعي هي بخير حتى سوارها وياية اخذتة
اضل اتأمل يجي يوم والكاها، يومية اخابر امي واخواني اطمئن عليهم، خابرت
ماجد من طلعت النتائج طلع ناجح معدلة 73 باركتلة المهم نجح
طبعا هو من عطلة الخامس لزمتلة دروس خصوصية والحمدلله نجح،
خلص شغلنة وخابرت امي كلتلهة بعد يومين اجي، كيفت
وديان: كنا كاعدين الصبح، دااسوي كعك ، كمت اسوي غير شغلات جبت كتاب طبخ، يعني شغلات خفيفة اسويها ويطلبوهة مني
وخواتي يمي وام عبدالله هم اجتي كالت ولدي طالعين واني وحدي، احنة حاليا بالعطلة الصيفية، مااعرف شلون مرت هاي الايام بهل سرعة
ورود: وديان اريد اروح للسوق
وديان: شكو ليش شعندج
ورود: ملابسي ذيقات علية صايرات
منى: من الاااكل خفي ع نفسج
ورود: وين اصلا اني مو سمينة ، خالة الله عليج اني سمينة
ام عبدالله: لا حبيبتي مو سمينة هواية جسمج عادي
ورود: شفتي اني مو سمينة
صابرين: اني هم اريد اروح للسوق محتاجة شغلات
وديان: وانتي ست منى هم تريدين شغلاات
منى: طبعاااا ناقصني هواي شغلات
وديان: خالة تروحين ويانة العصر
ام عبدالله: تدللون اني هم اشتري شغلات للولد، ما يعرفون يشترون الا اني اجيبلهم عبالك صغار
ورود: خالة ولدج كبار ليش ما همة يشترون
ام عبدالله: همة بكولشي معتمدين علية
ورود: خالة ابنج الحلوو شوكت يجي
ودياان: ولج ورود عطت
ورود: يي هسة اني شكايلة حلووو هو حلوو شبيج
ام عبدالله: هههههه بعد يومين انشاء الله يوصل
وديان: يوصل بالسلامة
ام عبدالله: الله يسلمج حبيبتي
وديان: طلعنة العصر رحنة للسوق وبدت مشترياات منى تروح ع مكياج تركض
اوويلي شكد تحب مواد التجميل مع انو هي حلوة بدون مكياج بس هيج تحب هذولي
الشغلات
ورود: وديان تعاااي اختاريلي يا لون اخذ
وديان: اخذي الوردي حلووو
صابرين: وديااان تعاي
منى: ودياان يا لون حمرة اخذ هاي لو هاي
وديان: ولا وحدة شتسوين بيهن
منى: حبابة حبابة بنفسي اخذ حمرة
وديان: اخذي وفضيها عاد فضحتني
ام عبدالله: اباوعلهن وخربانة ضحك صدك عبالك وديان امهن اني ما غلطت من كلت لقائد ام وبناتها 3 فعلا وديان الام وهذولي بناتها
وديان: اخذنة الي نريدة ودخلنة لمول جبير ام عبدالله رادت تشتري شغلات لولدها قمصان وكذا
كان المول جبير يتضمن كول الاشياء
شغلات نسائية ورجالية واطفال وحديث الولادةة كولشي يعني، ام عبدالله تعرف قياس اولادهة سألتني بالالوان الي تاخذهن لاولادهة
ام عبدالله: وقائد يالون قميص اخذلة
وديان: تذكرت ملامحة وكلتلهة اخذيلة القميص السمائي لونة كوولش حلوو وهادئ
ام عبدالله: قائد ما يلبس هيج الوان كولة اسود ونيلي وجوزي
ورود : خالة راح اكولج شغلة بس لا تزعلين من عندي
ام عبدالله: كولي
ورود: ابنج صحيح حلووو بس معقد
ام عبدالله: ههههههه ليش
ورود: يعني هوو حلو كولشي يلوكلة ليش متقيد بهل الوان
ام عبدالله: من زمان هو هيج
ورود: اخذيلة ياا وشوفي بلكي يلبسة تراا هو حلوو
وديان: ووجع شبيج شكلتي ع كلمة حلوو ترا افتهمنة حلووو شبيج
ام عبدالله: هههههههه اول مرة ادري بابني هلكد حلوو، هلكد ما ذكرتي هل كلمة
ورود: ههههه بعد مااكولها يلا
منى: وديان تعبت
وديان: من جنتي واكفة يم المكياح ما تعبتي
منى: اي
وديان: ووجعي
باوعت بالمول اكو اعلان مكتوب يريدون عاملة شفت بنية واكفة هم تشتغل بالمول، كلت لخواتي هسة اجي
رحت تقربت يم البنية وسلمت عليهة كلتلها رايدين عاملة كالت اي
ودتني يم المسؤل مال المول
كال يعني توكفين بقسم العطول فقط وساعات الشغل من الاربعة العصر لل8 بالليل
والراتب كلش زين يناسبني
كال اذا تحبين من باجر تبدين، رحت يم خواتي وضلن يسألني وجين جنتي ووين جنتي
كلتلهن ع موضوع
ام عبدالله: بنتي انتي مو دااتشتغلين يعني الفلوس الي دتطلعيها مدا يكفن
وديان: خالة يعني ع كد يسدن حاجتنة واني ومنى صرنة سادس ممكن نحتاج مدرسين او اي شي والبنات ديزيد مصروفهن
فرصة واجتني ع اقل اضم كم فلس بهاي العطلة حتى لو ع كد بس بالعطلة اشتغل
ام عبدالله: والله مااعرف شكولج بنيتي براحتج
رجعت للبيت وقررت اشتغل من باجر
صارت الساعة 3 ونص طلعت من البيت المول مو حيل بعيد اروح اتمشى هاي اهم فقرة عندي مااصعد سيارة طلعت ووصيت خواتي ع نفسهن
قفلن الباب وطلعت، وصلت وكتلة اني موافقة اشتغل باشرت بالشغل وكفت بالقسم مال العطور وبصفي واكف ولد بقسم الرجالي ع يمنة
و ع يسرة هم ولد واكف بقسم الاطفال، ووكبالي بنية واكفة بقسم الاكسسوارات هم زين اكو بهذا الطابق وياية بنية
من يجون يسألوني ع عطور الي عدنة واطلعلم العطر يشمون رائحتة يعني شغلة بسيطة والي وياي حبابين اني مااحجي وياهم بس اذا ردت شغلة
خابرت ع ام عبدالله اطمئن ع خواتي ما عدهن موبايل كلت بس اجمع فلوس اشتريلهن واحد يخلنة بالبيت تعرضا لاي شي
كالت لا يضل بالج اني يمهن
صارت ب 8 رجعت للييت الشوارع زحمة هسة بدت العالم تطلع بس شارعنا فارغ وصلت للبيت هلكانة ركضت صابرين جابتلي ماي شربت
ورود: حضري نفسج
وديان: شكوو
ورود: اجتج 4 طلبيات ع باجر
ودبان: رحت بدلت وارتاحيت وخواتي جانن مسويات العشة تعشيت وبديت اجهز الطلبيات وهنة كاعدات يتفرجن تلفزيون ويسولفن
ضليت مستمرة يومية اروح واجي من الشغل ابدي اجهز الطلبات وخواتي شايلات
نفسهن يشتغلن بالبيت معتمدة عليهن بس الطبخ اني اطبخ هنة يسوون شي بسيطة
بالمول دائما تصير مذايقات يعني بكل صلافة يوكف كدامي الولد وينطيني ورقة
بيها رقمة اني ماادير بال اندار اسوي حجتي انضف بالستاند مال العطور
مرات اندار الكاهم رايحين ومرات الكا الرقم عايفينة اشككة واشمرة والمشكلة هنا محد يتدخل او يبعدهم لاءن متعودين ع هاي الحالة
الي مو زينة وعاجبها هذا الشي تاخذ الرقم والي ماعدها هاي السوالف تبعدهم بطريقتها
قائد: اجيت من السفر ميت تعب وامي تلكتني تبوس وتحضن بية واني هم احس صار
دهر ما شايفها ضليت حاضنها وامشي لما دخلنا الصالة وكاموا اخواني يسلمون
علية
قائد: مبرووووك سيد ماجد ع نجاح
ماجد: الله يبارك بيك، يعني هسة بعد ما راح تكولي كوم اقرة
قائد: ولي بعد ماالي شغلة بيك
ام عبدالله : قائد روح ارتاح لما اجهزلك الاكل
احمد: اي عيني ليش لا اجة قائد حبيب قلبج ، ما خلت شي ما سوتلك يااا، لك تخيل تخيل
قائد: اي تخيلت الله يخليج الي بستها من راسها
ام عبدالله: ويخليك الي
قائد: وصلت المغرب اني رحت سبحت وصليت ونمت شوي كعدتني ع عشة امي كعدنة نتعشة
ماجد: لك شنوووووو هاااي
قائد: شنوو
ماجد: يمة ليش تفرقين ليش هيج ليييش
ام عبدالله: ولك شمفرقة شكووو
ماجد: صارلي اسبوع اتوسل بيج اكلج وصي هاي المرة تسويلنا بيتزا ما تقبلين
واليوم لاءن اجة ابنج العزيز رحتي ووصيتيها ع بيتزااا ليش لييش هيج
ام عبدالله: انت تدري ما عندي تفرقة واني قبل اسبوعين وصيتها وسوتلك تتذكر لو لا
اني استحي اطلب من عدها لاءن هي تسوي وتبيع للعالم بس من اوصيها ما تاخذ من عندي فلوس
لذلك استحي خما يومية اخليها تسوي وما تاخذ فلوس اليوم وصيتها علمود قائد
يحب البيتزا وحلفت مااخذ البيتزا اذا ما تاخذ فلوس وصارلي سااعة احلف وهي
تحلف
احمد: وتاالي منو تنازلت بيجن
ام عبدالله: هي اخذت الفلوس لاءن ردت اطلع ومااخذ البيتزاا
ماجد؛: هههههه اهم شي اكو بيتزاا
قائد: والله عاشت ايدها كوولش طيب اكلها
ماجد: لك ما شفت شي ، اوويلي من تدزلنة البورك او الكعك خوب الكبة الا بشدة
احمد: ولك اسكت شهيتني بالكبة تدري بية الكبة مااقاومها النوب ذكرتني بكبتها فدشي يعني
مصطفى: هاي شلون راح نضل نتشهى اكلها، يمة وصيها خل تسويلنا يمعودة عبالك احنة حوامل ودنتنسة
قائد: ههههه طاحضك
ماجد: اكول شوكت ترجع للشغل
قائد: هاااا شنو ما تريدني بالبيت لازم تعودت تسرح وتمرح بكيفك
ماجد: بس انت تفهمني غمزتلة، ههههه لا بس هيج دااكول
قائد: اطمئن 15 يوم كاعد ع قلبك مااكو شغل. بعد هذا التعب
ام عبدالله : قائد ما دام اجيت شنو رأيك اخطبلك بنية
قائد: يمة تراا ما صار هواي من اجيت وميت تعب وهم فتحتي هل موضوع موهسة
ام عبدالله: اي يا يمة لعد شوكت مو طك قلبي شوكت تتزوج
قائد: مو ع اساس مصطفى يتزوج
مصطفى: غيررت رأيي حاليا
احمد: احلف ليش ولك
مصطفى: صارت عرقلة بالموضوع
ماجد: كلكم ما بيكم خير، ولا يهمج يمة اني اتزووج
ام عبدالله: انت بالذات ماازوجك
ماجد: عااا ليش هيج
ام عبدالله: بالبداية بطل سوالفك المكسرة وبعدين تزوج علمود يومية مسوي طلابة ومخلي مرتك هاجة من البيت
ماجد: لا ودااعتج بس زوجيني اني ابطل هل سوالف
احمد: وهااي يا ثولة ترضى بيك
ماجد: لاا احمد مااسحملك تكول لزوجتي المستقبلية ثوولة
قائد: اباوع عليهم وابتسم بدون كلام دايخ فد مرة
ام عبدالله: يمة قائد روح نام وارتاح
قائد: رحت ارتاحيت جريتها نومة للصبح خابروني اصدقائي كالو اليوم العصر نطلع صار هواي ما شايفهم
اتفقت وياهم نطلع
بدلت واخذت سويح السيارة وطلعنة ضلينة نفتر بالمولات، محمد كال
محمد: تعاال ندخل بهذا المول كوولش راقي
وديان: كالعادة مستمرة بالطلبيات هل يومين ام عبدالله مااجتي علينا ابنها اجة من السفر خطية مشتاقتلة صار العصر
بدلت ورحت للمول الي اشتغل بي، لبست بنطرون قماش وفوكاه قميص طويل والشال رتبتة يعني ماالبس شي ذيق وهيج ملابسي دائما او تنورات
وصلت للقسم مالتي اجتنة مجموعة جديدة من العطور كمت ارتب بيهن مندارة وملتهية انضف واحطهن بالستاند
قائد: صعدنة بالطابق الثاني الي وياي راحو يشترون قمصان وكذت، اني تقدمت
ع قسم العطور، كانت البنية الي واكفة هناك مندارة وتعزل بالعطور ما
منتبهة
قائد: احم احم لوو سحمحتي
وديان: كنت مندارة ارتب بيهن وسمعت صووت بس هذا الصوت كأن مو غريب علية رفعت راسي ونداريت شفت ابو شوارب جمدت بمكاني
قائد: اندارت البنية واني نصدمت مداا اصدك
يتبع
شنو راح تكون ردة فعل قائد
ليست هناك تعليقات:
إرسال تعليق