مساء الخير والعافية عليكم حبايب
🌼⚘🌼⚘🌼⚘🌼⚘🌼⚘🌼⚘🌼
اريج ..صعدت وسلمت وحسيت نظراتو غريبه ماعرف شلونها الطريق كلو اني صافنه
ودموعي تنزل اخويه وصديقو يسلفون بس الولد ابد مانزل عينو من المرايه كل
ماارفع عيوني اشوفو يدحج ..
وصلنه قبل ميوصلون الكل نزلنه اني راسا نزلت اركض للقبر ابجي واصيح فدوه حببيبي كوم لو بس يوم واحد والله بدونك كولشي ماسوه ..
حبيبي تعرف مليت والله اتمنه هسه اني وياك جوه بلقبر واخلص ع الاقل اظل وياك مافاركك ..
اجوي الكل عمتي نزلت اتعيط واتصيح وتبجي وامي لزمتها وعمي يغطي عيونو بلغتره مالتو ويبجي عمتي كعدت اتنعي واتصيح ..
والله بقينه ملخنه نفسنه من البجي هيه تعدد عالولد وشلون ربتو وباللحظه
راح منها وكامت اتصيح اووف يهلوطن مشبعت دم مو خلصو ولدنه كافي ...
والله حتى كلبنه ميتحمل بعد
اني ابجي وادك ع وجهي واصيح يمه حبيبي شكالت روحك من انظربت كومونه الولد كالو يله كافي حرام عليجن هيج اتسون راح اتعذبنه ..
اني كتلو فدوه لاخويه عوفوني بس اليوم يمو ..كامو يحجون شبيج اتخبلتي
اتظلين اهنا كومي يله كومني عمي وامي كومت عمتي الي هيه مرت عمي كمت بلكوه
سانده نفسي ع عموو اخويه كالو صعدها اهنا عمو صعدني ..
عمي ..بابا اريج ماريد اخسرج نفس ابني صيري سبعه الي دتسوي مايرجع الراح
اريج ..اني محجيت شي كامو الكل صعدو بلسيارات ورجعنه للبيت كل واحد صعد بغرفتو
امي ..تعاي يمي اهنا يمه
اريج ..لا فوك احسن
امي ..والله مابيه حيل اصعد تعاي يمي نامي
اريج ..اجيت يمها وخلتني بصفها وتقره ع راسي واتكول عسا ان تكرهوا شي وهو
خيرا لكم اني بس اسمع احس حته قابليه ماعندي غفيت وكعدت الدنيا ليل وماكو
احد يمي طلعت لكيتهم ديتعشون ..
امي ..هله يمه تعاي اكعدي اتعشي ..
اريج ..هزيت راسي ماريد وعفتهم وطبيت وراها بسبوع ام صديق اخويه يمنه اجتي
سلام وسوالف ويه امي وتسال عليه واني جاعده بلمطبخ يم زوجة اخويه ..
وامي وهيه ديسولفن ..مرت اخوية راحت قدمت الضيافه وسمعتها اتكول لامي ابني
من شاف المحروسه بنتكم وانعجب بيها وباخلاقها وكال اريدها..
والله احنه نعرفكم انتو شنو واجينه عليكم وانتي ميحتاج امدحلج باابني وهو صارلو عمر ويه ابنج
امي ..ما اتوقع اريج تقبل لان تعرفين هيه خطيبها اتوفه صار سنه وهيه
متأذايه عليه بس اشوف واردلج خبر راحت المره وامي وصلتها الباب ودخلت
المطبخ كعدت كالت يمه انطيني مي كمت لثلاجه انطيتها لامي شربت ودحجت عليه
امي ..يمه تعرفين ليش المره اجتي
اريج .. دحجت ع امي وكتلها شمدريني اني يمه
امي ..يمه اتكول ابنها شافج ويريدج
اريج ..رفعت تك حاجبي بأستغراب كتلها يمه يريد منو
امي ..يمه يريد يتزوجج
اريج ..اني اتخبلت وكفت ع حيلي كتلها وانتي شكتيلها
امي ..كتلها اشوف واكولج
اريج ..ليش يمه متعرفين شنو رائيي ماريد ولا راح اريد اي واحد بلدنيا يمه
كولي للمره بنتي متقبل وليفكرون بيه بعد لان اني ماتزوج ابد ولا يلمسني رجل
عكب احمد ..كمت ابجي وشاغت روحي اووووف
امي ..هذا هو باجر اخابرها واكوللها اريج رفضت
اريج ..ماشي ..اجوي اخوية وعمي وامي كالتلهم ع موضوع الخطبة اخويه تفاجأ
محمد ..عجل اشو هو مكالي
امي ..يجوز استحه يحجي وياك ودز امو
محمد ..كتيلها لاريج
امي ..هزيت راسي اي
محمد ..وشكالت
امي ..شتعرف يعني اكيد رفضت
عمي ..خل اني احجي وياها الولد خوش ولد ليش ترفضو والحي ابقه من الميت شنو تحطم حياتها هذا عمر طويل جدامها شنو السالفه
امي ..براحتك ابو احمد
اريج ..جنت كاعدة بالغرفة واجه عمي دك الباب كتلو اتفضل فات عمي كمت عدلت
كعدتي اني متوقعه امي لو وحده من البنات لان عرفت امي كالت لاخواتي فات عمو
عمي ..ها بنيتي بس كون مازعجتج
اريج ..شنو السالفه عمو تعال اتفظل هلا بيك
اجه خطيه وكعد يمي
عمو ..بوية اني ما احب الف وادور
اريج ..عمو اذا ع موضوع الخطوبه ماريد ولا تفكرون اصلا
عمو ..ليش بنتي
اريج ..ماريد خلوني هيج احسن
عمو ..ميصير بوية كل واحد ويومو شمدريج شيصير الوحدو
والواحد لازم يكون اسرة ويستقر محد دايملج ابوية
اريج ..دنجت راسي بقهر لان ميحسون بنار كلبي المشتعلة كتلو عمو بس اني ماريد اتزوج
عمو ..انتي مامقتنعه بالولد كولي عادي باجر يجج الي احسن منو
اريج ..عمو العيب مو بالولد العيب بيه اني كلبي ميتقبل اي واحد
عمو ..هذا هو بابا بس تره هو خوش ولد وابن حموله
اريج ..الله يوفقو طلع عمو من يمي وراح
عمي ..رحت للهول وكتلها لامها والله ام محمد بنتج كولش قافله ومعانده
امي ..شسويلها خليها ع راحتها
محمد ..بس كون الرد ميأثر على صداقتنه اني وياه
امي ..اني اعرف شنو اكول لامو
اريج ..المهم الصبح المراه متحملت خابرت ع امي ..امي ردت عليها كالتها
ياهلا والمره تسال كالتلها فدوه شنو الاخبار مااتحملت والله وخابرتج
امي ...والله شكولج بس بنتي رفضت مو تقصير منكم لاوالله انتو اهل بس تعرفين هيه مامقتنعه بالزواج كولو
واحنه حته لو رفضنه انظل اهل وصداقه الولد متتغير عادي المره خطيه كالت
لاعيوني هاي قسه يجوز هيه مامقسومه للولد وهذا هو انشاء الله خير
اريج ..ارتاحيت من امي رجعت الخبر وبالليل اجتي اختي وع العشه دنسولف كالت شنو صاير اشو وجهج معاجبني
فاطمة ..مو خطيه اجوها ناس خطبوها
منار ..اي واذا ليش هيج وجها قابل جريمه عادي كل بنية تنخطب
فاطمة ..مو تعرفين اريج متريد هم رفضتو كل عادة
اريج ..اي واظل ارفض لو شيصير ماتزوج مدام متزوجت احمد محد يتزوجني غيرو
منار ..وشنو يعني اتظلين هيج بلا زواج الي ازغر منج اتزوجن وخلفن وانتي بعدج
اريج ..كلمن حر بنفسو
منار ..حبيبتي الناس متكول هيج يكولون بنت افلان عنست
اريج ..هه عادي ماضوج خلي يحجون ..الناس ماعدهم واحد نفس احمد حبهم الناس
متشوف الي اني شفتو وشيريد يصير خل يصير يحجون مصيرهم يسكتون ميسكتون عادي
..
كلام الناس اخر همي عفتها وكمت امي صاحت يمه تعاي شبيج اختج دتنصحج محجيت عفتهم ودخلت احس والله حتى الدمع خلص من عيوني ..
اجتي ورايه زوجه اخوية فاطمة كالت شبيج اريج تره كل الي يحجي وياج لمصلحتج بس انتي صايره متتحملين احد
اريج ..مليت من كولشي عوفوني بحالي ماريد نصايحكم ..
فاطمة ..ماشي يله هذا هو بس خطيه منار اخذت ع خاطرها لان محجت شي يزعل حتى هيج تجاوبيها
اريج ..هسه عود اروح احجي وياها
فاطمة ..عادي براحتج ..
اريج ..راحت فاطمة طلعت واختي منار اجتي راسا دخلت ..
منار ..حبيبتي اريج لتضوجين والله تره نحجي وياج لان ننقهر عليج ومنريد احد يحجي عليج ..
اريج ..لاعادي بس اتمنه هل موضوع ينسد وماينفتح بعد
سكتت وكالت هذا هو براحتج ..ومرات الايام عادي اي شي متغير وصار ع وفاة
احمد سنه و8 اشهر امي اتمرضت واخذنها للدكتور وتحاليل وهاي سوالف الروتين
مال الطبيب اني ويه امي اخذنها للتحليل سوينه وظلينه نتظر ..
اجتي
مره موحيل جبيره بالعمر يعني زينه كعدت يمنه واتسولف ويه امي وسالتها
كالتلها خاله هاي بنتج امي كالتلها اي يمه وظلت تسال بس هاي عندج امي
جاوبتها كالتلها عندي 2 متزوجات كالت الله يخليها الج بس مبين بعيونها قهر
امي كالتلها لاهيه خطيه فقدت خطيبها
اني اسمع بس ابد مجاوبت
المره ..خاله انتي من ياعمام
امي ..احنه من عشيره الفلانيه
المره ..اهاا خاله يعني انتوا سنه
امي ..ماكو فرق يمه كولنه اسلام
المره ..احنه من عشيرة المالكي
امي جاوبتها كلتلها ع الراس
المره ..خاله انتو تنطون للغريب
امي ..كولشي بلقسمه اذا زين ليش لا
المره ..زين خاله انتو وين كاعدين وبيت منو
اريج ..بقن امي والمره يسولفن المهم الحد مصاحو باسم امي كمنه اخذنه
التحليل والدكتور كال الروماتيز والسكر كولش صاعد عندج حجيه امي محجت اني
كتلو دكتور يعني هيه متاكل حلويات وعلاج ملتزمه بي ليش هيج
الدكتور ..الراحه النفسيه انتو مضوجيها شي
اريج .. ماعندنه شي الحمدالله كتب النه علاج وطلعنه اخذنه العلاج ورحنه
امي استمرت ع العلاج بس امي خطيه صحتها ع كدها بلنازل دائما يجن خواتي
وخالتي يغيرن من النفسيه ومرت عمي ابد مكطعت بينه دائماً تجي تشوفنه واتكول
ماعندي غيركم اتونس واطلع من قهري يمها ..
خطيه ترتاح من تجي
..المهم مر شهرين واني نايمه هيج تقريباً ساعه 11 اني بعدني نايمه تندك
الباب وزوجة اخويه فاطمة فتحت الباب جانت مره بالباب كالت السلام عليكم
انتو مو بيت ابو افلان كالتلها اي نعم
المراة ..بلا زحمة الحجيه موجوده
فاطمة ..اي اتفظلي دخلتها للاستقبال وصحت ع خالتي كتلها اكو مراه تسال عليج طلعت خالتي شافتها راسا عرفتها
اريج ..امي رحبت بيها وسلمت عليها وزوجه اخويه قدمتلها الضيافه اني كعدت من النوم كتلها هلو كالت هلو كتلها شنو يمنه خطار
فاطمة ..ماعرف مراه اجتني تسئلت ع خالتي
اريج .. اهااا ..واجتي المره كالت والله احنه سالنه عليكم والناس كلها
تمدح بسمعتكم واجينه نطلب ايد بنتج البنه لان والله حجيه حيل عجبتني بنتج
امي ..انشاء الله خير اشوف واكولج ان شاء الله انطتني الرقم مالتها وراحت
اريج ..امي اجتي كنالها منو دحجت علينه بنضره مثل الي تتوسل بيه كتلها ها امي شكو
امي ..اخاف احجي ونطلع موزينين
اريج ..خير يمه شصاير قلقتيني
امي ..يمه هاي المراه جايه تخطبج لابنها
اريج ..اني وكفت وصرخت من وجع كلبي كتلها شنو يمه رجعنه لنفس الموضوع مو
والله كلبي خلصص عوفوني يوميه واحد جاي عليه اذا هيج بعد ابد ما اطلع لو
شيصير راح ابقه مدفونه بنص هل بيت ..
امي ..تعاي لاتخذينه بالحجي والبجي وصريخج خلي نحجي مثل الناس
اريج ..ماريد يمه عوفيني بحالي ..
امي ..داكول تعاي لتعاندين
اريج ..كعدت يمها كتلها نعم اتفضلي
امي ..شوفي يمه اني ماعرف شوكت الله ياخذ امانتو يايمه فدوه العينج اقبلي
اتزوجي لان والله اذا متت وانتي ممزوجه والله روحي اتضل معلكه بيج ..
اريج ..اسم الله عليج ليش هيح تحجين 😔
امي ..والله تعبت يا يمه ..الخاطري شنو ماعندي خاطر عندج
اريج ..يمه والله ما احب غيرو حسوا بيه ليش تكسرون كلبي 😔..
امي ..يمه عجل ذني الي يموت ارجالهن وعدهن جهال وره فتره يزوجن شنو قابل
هنه مايحبن ارجالهن بس هم الواحد خما يموت نفسو ف يا امي اذا تريديني ارتاح
اتزوجي حتى اموت مرتاحه
اريج ..حسيت عبرة بصدري خنكتني كتلها فدوه يمه لاتحجين هيج
امي ..فكري يمه الله يرضا عليج ..
اريج .. اي يمه صااار افكر ان شاءالله انقهرت صدوك ع امي وكلت هاي افكر واشوف شيصير
فكرت بحجي امي وحسيتو صعبه امي تتوسل بيه يومين امي مسألتني ابد الحد ثالث
يوم الصبح كعدت وعادي نفس كل يوم ساعدت البنات وهنه ديسوالفن ..
دخلت امي كالت يمه اريج تعالي اجيت كالت هااا يمه شفكرتي كتلها يمه الي تشوفي هذا هو بساتني ..
امي ..فرحت من قبلت ع الزواج كتلها اي فدوه لطولج يمه خليني اموت مرتاحه
اريج ..بست ايدها كتلها يمه اسم الله عليج من عمري ع عمرج كالت يمه راح
اكول لاخوتج والعمج هزيت راسي ومشيت دخلت الغرفه وبجيت بجي حسيت انتيهت هذا
يعني راح يجي شخص غير احمد يشوفني ..
امي انطت خبر للكل وكالت هذا
هو وافقت اريج الكل اتفاجأ شلون قبلت واني لو مو امي ولا اقبل المهم العصر
امي كالت خلي هيه اتخابر مواني اخابر ..
المغرب خابرت ام الولد الي اسمو ماهر والله حتى ماعرف شنو يشتغل كالت لامي ها حجيه بشري ليش مرديتي خبر
امي ..وافقت البنيه تعالو اتفضلو
ام ماهر ..ان شاء الله باجر العصر اني وابني يمكم علمود اتصير رؤيا شرعيه
امي ..ماشي حبيبة هلا وميه هلا بيج
اريج ..اجوي ثاني يوم اني كتلها يمه والله ميحتاج هيج اني ماريد اشوفو
امي ..ميصير يمه الاصول هيج تكول
اريج ..سكتت بس دموعي احسها تحرك بعيوني متنزل ماعرف ليش فاطمة كالت حضري
نفسج كتلها راح البس شال وكولشي ما احط بوجهي امي كالت شنو تطلعين بل اسود
كتلها هم هاي احجو عليها بيه
امي ..يعني اكو وحده يجون يخطبووها تلبس اسود
اريج ..اي اني عندكم اعتراض المهم اجوي والبست اسود اني بيضه ماثر عليه
الاسود زوجه اخويه اتكولي هو هيج واشو طلعتي حلوه كتلها تعرفين اتمنه موتي
لا هيج
فاطمة ..ليش هيج تحجين هاي الدنيا ماشيه ويجوز يطلع حلو
اريج ..وشسوي بحلاتو
فاطمة ..شوفي اكيد راح يعجبج ..
اريج ..عكدت حاجبي بأستغراب وكتلها اكو احد موصلج شي
فاطمة .. لا والله
اريج ..المهم اجوي وطبوا للاستقبال بس والله حتى ارتباك مصار عندي كالت
امي تعاي ادخلي دخلت كلت السلام عليكم ردوا وعليكم السلام امو كامت اتصلي ع
النبي كعدت يم امي ومدنكه راسي ..
كعدت يم امي وبدو يحجون ماشاء
الله وهاي الحجي امي سالته كالتله يمه انت شنو شغلك جان يكول لامي والله
حجيه اني اداوم بالحشد الشعبي ..
اهنا اني راساً وكفت عندي اللقطة ورفعت راسي مثل الوحدة الي انكفخت ع راسها وانصدمت كتلو شنو يعني انت عسكري اني اتخبلت
ماهر ..اي هذا شرف اليه البي الشهداء وادافع على الوطن
اريج ..حسيت جسمي ثلج رجعت بيه الذاكرة لايام احمد من جان يحجي نفس هل حجي لحد ما اخذتو مني الشهادة ...
اندريت اني راساً وكتلو اسفه ماكدر اتزوج واحد بلجيش
ماهر ..ليش ماتشرفين لان اني بالحشد
اريج ..حشه والله انتوا تاج راسي بس اني اخاف ومااكدر والله مو اقلل من قيمتك بس هذا شي خاص بيه
ماهر ..براحتج هذا هو اسفين اخاف ازعجناج
اريج ..امي تعذرت منهم واني طلعت من الاستقبال زوجه اخويه كالت هاا بشري
شلونه كتلها زين شكلو بس شنو الفايده يداوم بلحشد دخلت امي متعصبة وتنافخ
امي ..ليش هيج سويتي بيه فشلتيني جدام العالم .
اريج ..تعرفين رائيي شنو مااقبل ..يوميه شنو اني يوميه اليه هم جديد
والنوبه تريدني اتزوج من واحد بالحشد حتى اخلف وايتم اطفالي وارمل نفسي
امي ..هذا هو انتي الحجي ضايع وياج
اريج ..اجوي اخوتي وامي حجتلهم شسويت بدو يقنعوني علبو كل واحد ويومو
كتلهم ماا شنو انتو متعاجزين مني ماريد وبعد لو شيصير ماتزوج وعفتهم وانتها
الموضوع وحمدالله متزوجت ...
والحد هاي اللحضه اني ممتزوجه ومرتاحه بحياتي وامي بعد ع وضعها يوم تصحه ويوم تتمرض
وماشيه الحياه عادي مناقصها غير بس احمد وابويه
هاي بعد شسوي غير بس ادعيلهم بالرحمه
وهاي كانت حياتي وراه وفات احمد وماكولكم نسيت احمد هو عايش ويايه وعمري
بدونو ميسوه واشتاقلو واروحلو دائما لان قريبه المقبره احنه بغداد وصار ع
وفاه احمد ٤ سنوات واهلي كل وكت يردون يزوجوني واني رافضه كولش وبعد ماعرف
القدر يجوز ظاملي شي واكثرهم يكلولي هو مو قسمتج وهذا يومو الله كاتبه الو
...
((گالوا قضاء وقدر لتلوم وأنسى وأبد لتعيش بالماضي گلتلهم أي بالوجه بس گلبي ما راضي♡ 😔😔😔))
وهاي كانت نهاية قصتي الي خسرت حب عمري وطفولتي وحياتي بسبب الوطن الي اخذ
من عدنه جثيير شهداء وبعدو دياخذ كم من زوجة اترملت وكم من طفل اتيتم وكم
من ام انفجعت وكم من حبيبة فقدت ..عايشين وننتظر مصيرنه بهل بلد الي اتدمر
بسبب ضعاف النفوس واتدمرنه ويا ..
الله ينتقم من الي كان السبب وحطم بلدنا وخلانه نعيش بخوف ورعب وفقدان وحزن وفاجعه ..اي لان قدر حبيبي فجع گلبي 😔
واشكر كاتبتنه ست سارة حبيبتي لان سمعتني برحابة صدر وسردت قصتي وشجعتني
انشرها ..ومتاكدة اكو جثيير قصص مثل قصتي مطالعه للعالم وبقت مدفونه ويه
اصحابها ...لاكن اني حبيت انشر قصتي حتى كل العالم اتشوف الي دنعيشوا بهل
بلد المظلوم ..هسه انطي القلم لست سارة تختم قصتنه
سارة ..تسلميلي حبيبتي ان شاءالله ربي يعوضج كل خير وينطيج ع كد صبرج ويجمعج باحمد بالجنة ان شاءالله يروحي ..
والى هنا حبايب بعد ماعشنه قصة اريج واحمد وشفنه مئسات الحب في بلدنه وكم
الحزن الي نعيشو بهذا البلد الجريح الي صار القهر والحزن رفيق دربنه وهذا
حال اغلب العراقيين ماشافوا يوم راحة بحياتهم ...والى هنا اودعكم واختم
قصتي ويارب كون توفقت بسردها الكم ونطيت حقها صح القصة هيه قصيرة بس تحمل
معاني جثييرة وعبر جثييرة
لو لا دماء شبابنا مابقينه عايشين بعز ومرفوعين الراس
الله يرحم شهدائنا الي ضحوا باروحهم من اجل ترابك ياوطن وهنيئا لكم الشهادة يا شباب وطني
((انا ابن العراق واليه انتمي ولو علقوني على المشانق لن انحني افديك بروحي وعيني ودمي ))
ومثل ماذكرت البارحة انو اكو شاب متقدم لاريج ووعدتني اتفكر بالموضوع وان
شاءالله بس تقبل وتزوج اوعدكم انشرلكم بارت ابشركم بخبر زواجها لان هيه
اختنه وحبيناها من خلال قصتها واكيد كلنه نتمنالها السعادة بحياتها يكفي
صبرت ووفت بحبها لاحمد وهاي صارلها 4 سنوات باقية ع ذكرى حبو ...بس هم لازم
تشوف حياتها لان محد دايملها بهل دنيا وكلمن يكول ياروحي بهل زمن ..عسى
تبشرينه يا اريج بخبر خطوبتج من هذا الشاب وربنه يكتبلج ويا السعادة
الابدية ياااارب 😘😘
شعر من اريج اهداء لاحمد 👇👇
ليش استعجلت
انته وكل شهيد الطاح وفه الكاعه
اقنع الروح يمكن لو كلت انساك بس
كلبي الدفنته وياك شيقنعه
........
وفي النهاية أهدي سلاماً طأطأت حروف قلمي رؤوسه خجلة، وتحيةً اجلالاً
تملؤها المحبة والافتخار بكل شهيد قدّم روحه ليحيا الوطن. الشهيد نجمة
الليل التي ترشد من تاه عن الطريق، وتبقى الكلمات تحاول أن تصفه ولكن
هيهات، فهذا هو الشهيد.
وها قد وصلنا الى ختام قصتنه استودعكم بيد الذي لاتضيع عنده الودائع والسلام عليكم ورحمة الله وبركاته
انتظروني بقصة جديدة
تحياتي
أحمد
3/6/2019
ليست هناك تعليقات:
إرسال تعليق