الكاتبة. Zainab Farqad
بارت 5
سيصدأ يوما معدن غير صادق
وتصفو على مر الدهور السبائك.
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
وديان : كعدنة ثاني يوم لل9 يلا طلعنة كان يوم عطلة مااعرف مال شنو ، حتى تاريخ ، الشهر ، اليوم ، مااعرف شنو
كضينة اليوم كله ما نطلع ابو سامر اجة بالليل وانطاني الفلوس كال بعت
الغراض جانن قليلات يعني تشكرت منة ادري الغراض تعبانات همزين نباعن
احنة استلمنة شغل البيت كله نضف وام سامر تتأمر علينا صح هي خلتنة بيتها بس هي عاملتنا كخدامات او اقل من خدامات
ومن تحجي ويانة كلة بصياح ونتر اني اسكت علمود خواتي وين نروح بس منى من الموقف مالت المدرسة كامت ما تسكت تحجي دائما
واني احاول اسكتها مانريد مشاكل
عدا اليوم الاول ع خير ما نطلع من الغرفة من يجون الولد، بس نسمع صوتهم نركض للغرفة
تحفضا لأي شي يصير
بالليل دخلنة كلنة ننام ،
دك للموبايل مالتي باوعت رحاب المتصلة
رحاب: الو وديان شلونج
وديان: الحمدلله حبيبتي انتي شلونج
رحاب: الحمدلله بخير، اتصلت بيج ابشررج
وديان: خير ان شاء الله
رحاب: سيف تقدملي. واهلي وافقوا راح نتزوج
ودياان: صدووك الف الف مبرووك يارب يتمملكم ع خير
رحاب: تسلمين حبي، يوم الالج
وديان: اي كوليلي شلون وافقوا،
رحاب: ولج هاي مرت ابوية ما تمر عليها سالفة، من سيف كال كذا يوم اجي اخطبج اني قبلها بيوم بالليل تسحبت للغرفة واخذت الموبايل
واتصلت عليه، وتأكدت باجر راح يجون اهلة يخطبوني، وصدك والله ثاني يوم اجني النسوان يخطبوني
اني رحت كعدت بالغرفة سويت حجتي ماادري
واجتي مرت ابوية ما صدكت اجوني خطابة تريد تخلص مني، سويت نفسي ما مقتنعة ومجبورة مااريد ابينلها اني فرحانة
لاءن لو تدري هو هذا نفسة الي جنت احجي ويا، والله تحش بعقل ابوية وما تزوجني يا، وتالي هي فرحت راح تخلص مني
وابوية سأل عليه وانطاه الموافقة
وديان: والله طلعتي مو هينة، اي شوكت العرس
رحاب: والله ماادري بعدنة ما محددين يوم، بس تكمل التجهيزات مال العرس نتزوج بسرعة
وديان: الله يتمملكم ع خير حبيبتي فرحتلج من كل قلبي
رحاب: الله يسلمج حبي ياارب يفرح قلبج، انتو شخباركم
وديان: الحمدلله ع الله عايشين عند بيت ابو سامر
رحاب: اعذربني مدا اكدر اجيج والاه بس نعقد واصير ع ذمة سيف بعد مرت ابوية ما تتحكم بية وتلكيني يومية يمكم
وديان: معذورة عيوني،
ضلينة نحجي فوك الساعة وخواتي يباوعلي ويتسمعن ع حجي مالتنا، سلمت عليها وسديت الموبايل
اخذتلي صفنة ودعيتلها من كل قلبي ربي يتمم عليها بالخير وتنسعد
ورود كالت
ورود : عطشت اريد مااي،
وديان : لا تطلعين باجر اشربي
ورود : وج شنو باجر ، ميتة عطش ، اريد مااي
منى : وليش ما شربتي قبل ما ندخل للغرفة
ورود : شربت وهسة عطشت فدوة خل اطلع
منى: ليش ما جبتي وياج الماي من دخلنة للغرفة
صابرين: شمدريني نسيت، هسة شلووون عطشت اريد مااي
وديان : كتلج لا تطلعين نامي هسة ،
صابرين : كااافي خل انااام يمعوداات
ورود: ضليت اتكلب بفراشي وانتضر خواتي ينامن، مااتحمل اني اضل عطشانة شيصبرني للصبح غير اموت
باوعت شفت صابرين نامت و وديات بدت تغفى بس هاي منى بعدها مفتحة عيونها مدري شدتفكر
شكد اتمنى ادخل بتفكير العالم واعرف شيفكرون اتمنى عندي هذا الشي
ياربي دنطيني موهبة، اي موهبة راضية بيها ، ليش ما عندي اي موهبة
لا بس رجعت فكرت اني عندي موهبة الاكل، اهووو جبت طاري الاكل والله جعت
ورود كافي تفكرين لازم انام، شوكت منى تنام واطلع اشرب ماي وبلكت الكة شي اكلة
كنت افكر بيني وبين نفسي 👆
باوعت عليهن نامن كلهن رحت تسحبت وطلعت من الغرفة رحت للمطبخ شربت ماي وضليت ادور بلكي اكو شي اكله
بعدين كلت عيب ادور بغراض الناس، العطش مااكدر اتحكم بي وشربت ماي بس الجوع اكدر
استحمل للصبح،
دااطلع من المطبخ صار بوجهي اخو سامر اسمة حسن باوعلي من فوك ليجوة
ردت اطلع كال
حسن : هااي شنو انتن كلجن حلوات
ورود : ما حجيت ويا طلعت جرني من ايدي ودخلني المطبخ
حسن : اوكفي شوية ، خل اشوفج زين
ورود : متت خوف كمت ابعد بي واني خايفة اخاف تجي ام سامر ، وهو بدا يتقرب
مني ويشم بركبتي شكد تقززت من عندة كمت ادفع بي بدون صوت وهو محاوط ادية
تقرب باسني من شفايفي ، عضهن حيل ، عطت جان طابكني ع كاونتر تحركت وكع الكلاص الي جان ع كاونتر وصار صوت واني عطت
اجتي ام سامر تركض وعاطت
ام سامر : ولج يا حقيرة شعندج بنص الليل جاية للمطبخ
ورود : جنت ابجي وكوة اطلع الكلمة اجني البنات يركضن باوعت ع حسن عدل نفسة وكال
حسن : يمة اجيت للمطبخ اشرب ماي وهي اجتي تتموع وتسويلي اغراء تقربت منها
ردت اضربها وأدبها وهي كامت تعيط تكلي الا اكللهم انت تتحرش بية
ورود : ضليت مصدومة من كلامة ، ياا جذاب خالة والله يجذب ردت احجي وام سامر سكتتني
ام سامر : انجبي لج ساقطة عرفتج انتي وخواتج ، هاي سوالفجن امجن ما عرفت تربيجن
وديان : لهنا وكافي مااسمحلج تحجين ع امي واحنة اشرف من الشرف ولدج يتحارشون
ام سامر : لا والله وفوكاها. انتي ام الراهي وتعلين صوتج علية وببيتي
وديان : سمعنا صووت صااح كلنا سكتنا
ابو ساامر : ام سااامر شنو هل حجي ،
وديان : اجة ابو سامر وتقرب من حسن وضربة راشدي ، وكالة هاي سوالفك مو علية ، ادري بيك واحد سكط وانتي جاي تدافعيلة
اندار علينا وكال روحو لغرفتكم ، اخذت ورود جانت منتهية بالبيجي دخلنة وقفلنة الباب وسمعنة اصواتهم
ام سامر : هذني البنات ما يبقن عندي
ابو سامر : مو بكيفج ، ولدج السكط المنحرفين ما تحجين عليهم ، ندرتي ع هذني البنات لاءن ما عدهن احد
ام سامر : انت كلتها بلسانك ما عدهن احد ، الله اليعلم شيسوون من ورانة هم
، كاافي انت أديت واجبك وسئلت عليهن وكل يومية دازني اسئل عليهن واشوفهن
غصب عني
واستقبلتهن ببيتنا كافي خل ينكلعن مااريدهن ، كووة يريدن يجرن ولدي
ابو سامر : انتي ماالج دخل اني اطرد بكيفي وادخل بكيفي روحي لغرفتج يلا ، وانت حسن من باجر تلم هدومك وتروح لبيت عمك
ام سامر : تطرد ابني علمود ذني الساقطات والله احرك الغرفة عليهن
وديان : جنة كاعدين ونزلت دموعنة بعدها هدأ البيت ما سمعنة اصوات ، ضليت
افكر احنة لازم نطلع ، بوجودنا جاي نسوي مشاكل ، وما دام ابو سامر طرد ابنة
اكيد الحقد راح يزيد بكلب ام سامر تجاهنة ، واذا ضلينة اكثر ما
راح يعوفونة بحالنة ولدهة الباقين راح يضلون ينهشون بلحمنا وعرفت بوقتها
جانت تجي علينا جبر من ابو سامر حتى يطمئن علينا
احنة الفجر لازم نطلع
كافي الي صار العالم تحملونة هواي واحنة ما نريد نصير عالة ع غيرنا،
ولا نريد نسوي مشاكل وابو سامر راح يطرد ابنة علمودنا، اكيد مااقبلهة وهو مو ذنبة يتحملنة
الرجال الله يبارك سئل علينا واستقبلنة ببيتة
منى : اي ما نبقى بعد هنا ، كافي الي صار ما نريد تصير مشاكل بينهم اكثر
صابرين : زين ليش الفجر نطلع ، الصبح احسن
وديان : لا اذا طلعنة الصبح ابو سامر ما راح يخلينة نطلع ، واحنة لازم من الفجر نطلع
ورود : مسحت دموعي ، زين وين نروح
وديان : ارض الله واسعة ، والله ما ينسى عبدة ، كومن حضرن جنطجن والمستمسكات
كمت حضرت الجنطة مالتي وحطيت كل المستمسكات يمي بالجنطة وضميت الفلوس الي نطاني ياهن ابو سامر مال بيعة الغراض
حضرنة نفسنة اذن الفجر ، سمعت صوت كلت اكيد ابو سامر كعد يصلي ، ورة نص ساعة باوعت كلت
اليوم شنو من الايام او شكد بالشهر
منى : اليوم خميس هياتهة التاريخ مكتوب بهذا الفايل
وديان : جان اكو تقويم مال تاريخ معلك بالغرفة ضليت اباوعلة نداريت عليهن كلت ، يعني احنة بمحرم
منى : اي
وديان : كلتلهن يلا نطلع ، لبسنة عباياتنا واخذنة الجنط طلعنة نتسحب مثل الحرامية ، لكيت اكو دفتر صغير واقلام يمة
اخذتهن وكتبت رسالة الابو سامر تشكرت من عندة وانطيتة خبر احنة طالعين بس ما كتبتلة المكان الي راح نروحلة لاءن اني اصلا ماادري
وين راح نروح ، علكت الورقة بمكان يشوفوها ، وطلعنة من البيت نمشي ، اكو
ناس بالشارع ما تفاجئوا بوجودنا ، عبالهم احنة زوار ودنروح للزيارة
باوعت للبنات كلتلهن ، احنة راح نروح لكربلاء
صابرين : ولج شنسوي
منى : يمعودة شيودينة لهناك
وديان : ما عدنة حل ثاني ، هسة وقت الزيارة والعالم رايحة مشاية ونروح وياهم محد راح يشك بينا احنة وحدنة
ورود : وديان اني خايفة عفية
وديان : لا تخافين اني وياجن ، صيرن قويات احنة لازم نتحمل ، رحنة للكراج
مشي ، سألنة رجال جبير كتلة وصلنة لاقرب مكان يرحون بي الزوار مشي
هو خطية رجال جبير وتعبان ، كال اصعدوا اوصلكم وصلنا وانطيتة الاجرة ، همزين جانت قليلة الاجرة
باوعت شفت العالم تمشي ، باوعت ع ملابسنة احنة كلها اسود ملابسنة همزين ، شفت اكو محل صغير باوعت ع ورود وجهة اصفر اكيد تعبت
كلتلهن انتضرني اروح اجيب شي ناكلة واجي ، رحت اشتريت نساتل وكيك وعصير ، هذا الي عندة
انطيتهن الخواتي كل وحدة اكلت شوية الا ورود جانت جوعانة وتاكل بشراهة ، ورود ام كرش نصيحلهة هواي تحب الاكل
كملنة وبدت رحلتنة بالمشي ، ع طول المشي ادعي وانخي ابو عبدالله ( سلام الله عليه ) يفتحهة
ضلينة نمشي ويا الزوار ، كل شوي نكعد من ورا ورود تتعب ، اكو اماكن استراحة ندخللهة نغسل ونرتاح ونرجع نكمل طريقنا
جنت احس العالم تباوعلنة بتعجب لاءن وحدنة واحنة شابات ماكو احد ويانة ، بس محد ماالة شغلة بينة كل واحد بطريقة ،
ضلينة 4اياام نمشي لحد ما وصلنة هلكنة هلااك لما وصلنة ، دخلنة للحضرة ، رحنة توضينا ودخلنة للحضرة ما كدرنة نستحمل كلنا بجينا
وصلت للشباك ونخيتة يسر حالي اني واخواتي ويبعد عنة اولاد الحرام دعيت وبجيت واخواتي وياي لازماتني اخاف يضيعن
رحنة صلينا وقرينة قرآن ارتاحينة من صدك رااحة نفسية طلعنا رحنة جان اكو
مطعم قريب اشتريتلهن لفات واني ماخذتني الحيرة ، جنة كاعدين بالصحن وكل
وحدة لازمة السبحة وتسبح وتدعي
كملنة وكالت منى
منى : وديان شنو الخطوة الجاية راح شنسوي
وديان : والله حايرة مااعرف ربج يحلها
ورود : فدوة الكيلنا حل خما نضل بالشارع
صابرين : ما عدنة غيرج وديان فكري والكيلنة حل هسة وين نروح
وديان : اخذتني الحيرة شراح اسوي حسيت بحمل ثقيل ع ضهري خواتي امانة عندي
جانت اكو مرة جبيرة بالعمر وجهها ابيض مدور ، شكلها نوراني تقربت يمنا
وكالت
يمة شبيجن ليش وحدجن جايات وماخذتجن الحيرة ،
وديات :
اني خفت ليش تسئل لازم اكون حذرة مو ياهو الجان نسولفلة ، منى فتحت حلكها
رادت تحجي ضربتها خفيف مخليتها تحجي ، المرة ابتسمت وكالت
اني ام عبدالله ، لا تخافن من عندي ، ردت اساعدجن شفتجن حايرات واتعجبت وحدجن ماكو احد وانتن ما شاء الله بنات شابات
من بداية الزيارة انتبهت عليجن
وديان : مااعرف حسيت بالامان وبديت احجيلهة ع كولشي ، ودموعي تصب اني واخواتي حتى هي هم بجت ويانة
ام عبدالله : الله يساعدجن ، والله العالم ما ترحم ، اني من بغداد وابني اجة وياي للزيارة ، اذا كدرت اخذجن وياي
وديان : لا خالة اشكرج ، احنة حجينالج حسيناج مثل امنة بس مستحيل نقبل
نروح ويا احد احنة ندبر نفسنة ، حجيت هيج مااريد بعد مذلة اكثر كافي علينا
ام سامر والي صار ويانا
ضلت ام عبدالله تحجيلنا ع عائلتها كالت
اني عندي خمس اولاد ، الجبير اسمة عبدالله متزوج ومسافر خارج العراق
والثاني قائد ضابط. والثالث مصطفى بالكلية ثالث مرحلة والرابع احمد
بالكلية هم اول مرحلة والخامس ماجد صف سادس اعدادي السنة ،
ضلت تحجيلنا عن حياتهم واحنة هم صدك حسيناها مثل امنا كامت تنصحنا ندير بالنا ، ورود كالت
ورود : وديان عفية اشتريلي ماي هذا البطل خلص
وديان : هسة راح اكوم اشتريلج ، كمت وكلتلهن لا تتحركن منا لحد مااجي
ام عبدالله : روحي يمة اني يمهن
وديان : رحت للمحل جان ازدحام عليه اكو واحد. شكلة شاب مو حيل جبير ضل
يحوم يمي استغفر الله ، يادوب اشتريت كم بطل ماي وكم شغلة نحتاجهة فتحت
الجنطة دااطلع الفلوس مااحس الا ورقة نذبت بالجنطة
شفتها مكتوب رقم
، استغفر الله حتى بالزيارة هم جايين هيج يسوون ، رفعت راسي شفتة مبتسم ،
وشفت واحد ورا واكف يباوع علينا وخازرني ، هسة اني شعلية يخزر بية ما يخزر
الولد الي يكول
اني كتلة انطينة الرقم ، باوع علينا وزمخ بصوت عالي وكال ، ع اقل احترمو المكان الي انتو بي
اجتني حركة اضربة بوكس ع هذني شواربة الي تارسات وجهة ، انطيت الفلوس ورحت انطيت الماي للبنات وكعدنة ضلينا نسولف
جنت مدنكة راسي واسبح بالسبحة سمعت صوت عالي كال
الله يساعدج يمة ، يلا نروح
رفعت راسي وشفنة نفسة هذا ابو شوارب ، هو باوعلي ورفع حاجبة
ام عبدالله : اي يمة نروح بس عندي كلمة وياك ، بنات هذا ابني قائد الضابط
وديان : انصدمت هذاا الضابط يمة صدك يخوف
قائد : تفاجئت اشو امي كامت تعرفني ع ناس
وديان : كلنة كلنالهة الله يحفضة ويخلي الج ، اخذتة ع صفحة وصارت تحجي ويا
جان اتجاهة يباوع علينا امة تحجي وهو يباوع علينا ما خلة وحدة ما باوعلها
احنة جنة مدنكين بس كل شوي ارفع راسي
واشوفة يباوعلنا ، عرفت امة جاي تحجيلة قصتنا وتريدنا نروح وياها ، واني مستحيل اقبل حتى لو هو قبل اني مااقبل
شفت بعيونة غضب وكأن رد طلب امة وامة تحاول تقنع بي من تعابير وجههة ، رجعت دنكت راسي واجتي علينا وكالت
ام عبدالله : يمة دير بالج ع اخواتج ولد الحرام هواي دير بالج عليهن ولا تعوفيهن تمنيت اخذجن وياي بس
وديان : قطعت كلامهة وكلت ، لا خالة تسلمين اشكرج ما قصرتي ، ام عبدالله
طلعت فلوس وانطتهن الي كالت مشو اموركم بيهن ، ما قبلت اخذ كلتلهة اني
عندي،فلوس ونكدر ندبر نفسنا تسلمين
شفتها دمعت عيونها ، حسيت شفقت علينا دنكت وبوستني ورجعت بوست اخواتي و ورود دمعت عيونها حسيت وكأن لكت حنان امي بام عبدالله
راحت ام عبدالله رفعت راسي شفت ابنها ابو شوارب يباوعلنا ، نزلنة راسنة وراحوا همة
تمنيت امي عايشة اووف ياامي من رحتي كسرتي ضهورنا وما عدنة احد وين نروح
ضلينة 5 ايام بالزيارة اكو مكان ننام بي ويا الزوار اني جنت ماانام اخواتي
ينامن واني اضل كأن حارس احرسهن اني اغفى شوية وكأن احد يكعدني
مااعرف ما متعودة ع مكان ،
صار الفجر طلعت اتنفست هوا وسمعت صوت الاذان صدوك راحة نفسية ، رحت صليت ودعيت الله يرحم بحالنا ويوفقنا ويبعد عنا اولاد الحرام
اكو شيخ بدا يقرء قرآن ما تحملت بسرعة صار عندي خشرع وبجيت من زمان ما باجية هلكد حسيت طلعت الحركة الي بكلبي كلها
كعدن خواتي الصبح مثل كل مرة اكو اماكن نغسل بيها ونغير ملابسنة ونرتاح الصبح كاعدين
اجة علينا واحد لابس عمامة مبين شيخ كال
السلام عليكم
وديان : عليكم السلام والرحمة
الشيخ : بنتي شفتكم وحدكم هنا خيركم صارلكم هواي هنا شعدكم محتاجين شي اكدر اساعدكم بشي
وديان : ترددت احجي لو لا ، كتلة والله السالفة طويلة
الشيخ : اني هسة عندي شغل ما دام السالفة طويلة العصر اجي وتحجيلي وان شاء الله اكدر اساعدكم
وديان : راح الشيخ كان وقت ضهرية كعدنة كل شوية نصلي وندعي الله يرحم بحالنة
هنا ما شلنا هم الاكل والشرب لاءن كلها توزع ثواب ويجيبون النا ، الفلوس الي عندي بقن شوي منهن
حتى اذا اريد ااجر مشتمل ما يكفن ، ورود كاعدة تباوع ع بنات الي يزورن بعمرها
جانن يجن ويا امهاتهن ولابسات احسن لبس وفوكاها العباية
حسيتها تباوعلهن بحسرة ، نقهرت عليها ، رحت يمها وكمت احجي وياها احاول الهيها وانسيها وجعها
كاعدين كلنا ما نتفارك ابد ، واخذتني الصفنة ، قبل كم شهر جنة عايشين احلى عيشة رغم البساطة
تذكرت مدرستي وصديقااتي جريت حسرة اووف ياربي ارحم بحالنا
اجة العصر نفسة الشيخ رحنة ع صفحة وكمت احجيلة وهو مدنك راسة ويستمع الي
الشيخ : والله يابنتي مااعرف شكلج بس اكدر اكولج تكدرين تخدمين هنا انتي واخواتج بالحضرة
وديان : اي ما عندي مانع نشتغل بس المهم محد يتعرضلنة
الشيخ : شوي وارجعلج ، لازم استشير. الشيوخ الي وياي انتضرينا هنا
وديان : راح الشيخ واني ضليت واكفة بمكاني واباوع الخواتي من بعيد يباوعلي
، ورا شوية اجة الشيخ وويا رجال ثاني يطلع بالاربعين عمرة
الشيخ : بنتي هذا ابو رسل ، يشتغل بدار الايتام وعندة معارف ، هو كال اكدر اتكفلهن واوديهن لدار الايتام
وديان : يعني اني واخواتي مو
الشيخ : اي اكيد ، اني اكدر اخليجن هنا ، بس تحفضا لاي شي يصير وهنا مو كل
الناس عدها مخافة من الله ف دار الايتام احسن الجن وان شاء الله ابو رسل
ما يقصر
ابو رسل : انتي كم اخت عندج
وديان : هذا الي اسمة ابو رسل اكلني بنضراتة حفضني من فوك ليجوة ، كتلة 3
ابو رسل : وشكد اعمارهن
وديان : اصغر مني كولهن
ابو رسل : اهااا ، شيخ اني راح اخابر المسؤلة عن دار الايتام هي تجي
تاخذهن وتتأكد بنفسك خليهن يمك كم ساعة لحد ما توصل تدري طريق طويل ، وانتو
حضرو نفسكم
وديان : تشكرت من الشيخ ورحت حجيت الخواتي ع الي صار
منى : الحمدلله الله رحم بحالنا
ورود : وديان انتي متأكدة نروح لدار الايتام
صابرين : احجي وديان ليش حايرة
وديان : والله ماادري حايرة مااعرف هل خطوة خير النة او شر ، توكلت ع الله
وبدينة نحضر نفسنا ورا كم ساعة مرت اجة الشيخ وويا ابو رسل وصاحلنا قبل ما نطلع صلينا ودعينة الله يفتحهة بوجهنا
جانت اكو مرة جبيرة واكفة وياهم يطلع عمرها نهاية ال30 او بال40 مااعرف بس مرتبة ولابسة العباية فوك ملابسهة
تحجي وياهم تقربنة وسلمنة هي ردت السلام وضلت تباوعلنة طلعت اوراق حتى
تثبت هي مسؤلة عن دار الايتام سلمنة الشيخ الها وكال ، ديروا بالكم ع نفسكم
بناتي وان شاء الله ما يقصرون وياكم
رحنة وياهة من طلعنة اكو خوف
واكو امل انو نلكى بيت نأمن بي ، صعدنة بالسيارة ليورة اني واخواتي جانت
جبيرة وهي صعدت ليكدام وواحد يسوق ويحجي وياها سمعتة يكللها سعاد
سعاد : سويت الي طلبتة من عندك
جاوبهة وكاللهة لا تشيلين هم باجر يكونن عندج
احنة الحيرة اخذتنة شنو وليش يحجون بالالغاز ، وصلنة بالليل لاءن رحنة لبغداد
يتبع
تحياتي
15/6/2019
ليست هناك تعليقات:
إرسال تعليق